Letër nga Drejtorja Ekzekutive

Të dashur klientë,

Ju falënderojmë që keni vizituar hotelet “Diplomat” dhe mirë se erdhët në faqen tonë të re të internetit. Kompania jonë këtë vit mbush 22 vjeç. Rrugëtimi ynë deri më sot ka qenë i gjatë dhe i bukur dhe do të doja të ju falënderoja për mbështetjen dhe feedback-un e vazhdueshëm. Që prej themelimit tonë në vitin 1993, kemi qenë të përkushtuar që në hotelet tona, të ndiheni si në shtëpinë tuaj. Qasja jonë ka pasur gjithmonë në qendër klientin, ndaj dhe ne kemi punuar vazhdimisht për përmirësimin e infrastrukturës, shërbimeve dhe mjediseve tona, dhe ndikimin që ka pasur biznesi ynë në mjedisin dhe komunitetin përreth nesh.

Duke qenë se përmenda mjedisin dhe komunitetin, do të doja të flisja pak për faktin se ne jemi miqësorë ndaj mjedisit. Gjatë këtij viti, ne prezantuam panelet diellore në të dyja hotelet tona. Kjo arritje është shumë e rëndësishme për ne, pasi ne i kemi shtuar një vlerë të re biznesit, dhe stafit tonë dhe juve që përqafoni filozofinë tonë. Jemi krenarë që po japim kontributin tonë për një mjedis më të mirë dhe për trajtimin e qëndrueshmërisë mjedisore si një element thelbësor i së tashmes dhe së ardhmes.

Ne vazhdojmë të përparojmë dhe të kemi pasionin për t’u kujdesur për ju.

Si Drejtore Ekzekutive dhe si një nga punonjëset e para të hoteleve “Diplomat”, ju uroj një qëndrim të këndshëm tek ne!

Përshëndetje të përzemërta,

Mirjana Kuka